Puno ng Kagandahan: Ating lakbayin ang paraiso ng Marieya Resort.

Napapalibutan tayo ng isang malawak na mundo na puno ng mga gawain at mga responsibilidad na naghihintay na ating tuparin. Kaya naman minsan kailangan din nating magpahinga at takasan ang mga pasaning ito. Sa harap ng mga pagsubok at trahedya na umiiral sa mundo, mayroong isang pook na nag-aalok ng panandaliang pahinga at katahimikan— ang Marieya Resort.

 Isang araw, ako at kasama ng aking mga kaibigan ay nag desisyon na magpahinga muna sa mga gawain at responsibilidad kaya nagpasya kaming mag piknik sa lokal na turismo ng aming barangay, ang Barangay Santa Lucia kung saan matatagpuan ang paraiso ng Marieya Resort. Dahil sa aming palagay mas mahalagang itaguyod namin ang aming lokal na kayamanan kaysa sa mga malalayong lugar. 

Ang Marieya Resort ay kilala rin noon bilang Maracay Resort na dating pagmamay- ari ni Nancy Lacuata ngunit ngayon ito ay pagmamay- ari na ni Auril Rey Saturno Duyag. Ang resort na ito ay matatagpuan sa Purok 3, Brgy. Santa Lucia Maria Aurora, Aurora. Galing sa pangalan ng aso na si Marieya ang pangalan ng resort nang dahil sa kaniya at sa mga anak niyang tuta ay na rentahan nila ang buong resort kaya naman nagsilbi itong inspirasyon sa kanila upang ipangalan sa kaniya ang naturang resort.

 

Habang kami ay naglalakad nakikita namin ang mga bata sa lansangan na talaga namang nagkakatuwaan sa larong piko, chinese garter, at patintero. Ganito lamang ang buhay ng mga bata dito dahil nga wala namang palaruang parke ang barangay na ito. Nakakita rin kami ng mga matatanda na nagtatanim sa garden ng barangay dahil dito  sila nangunguha ng kanilang inuulam kung minsan, nagagalak kaming makita ang ganitong proyekto ng isang barangay dahil pinapakita lamang nila ang kanilang pagkakaisa bilang mamamayan. Hindi nagkagayon ay narating na rin namin ang daan papuntang resort sa pamamagitan ng pagpasok sa Saturno’s Farm and Ponds.

 

Kung ang mga bibisita ay nasa kalapit lamang na barangay mararating ito sa loob ng (walong) 8 minuto kung ang gamit ay van, at (sampung) 10 minuto naman kung tricycle.

Ang unang hakbang sa kaharian ng Marieya ay tila isang pagsilay sa misteryo ng gubat. Sa bawat yapak, nararamdaman mo ang pag-awit ng mga dahon at ligaya ng mga ibon na nagliliparan sa paligid. Ang pinagsanib na gubat at resort ay nagbigay ng espesyal na karanasan na tila ba't ang pagkakaugma ng tao at kalikasan ay maaaring maging maganda at makabuluhan. Sa paglalakbay, natuklasan ko ang mga nakatagong tanawin na puno ng niyog at bulaklak na nagpapakita ng kaharian ng likas-yaman na masasaksihan sa Brgy. Sta. Lucia.

Sa pagpasok namin sa resort na ito bumungad agad sa amin ang dalawang higanteng rebulto na kung saan kami ay nag selfie bago tumuloy sa aming cottage. Ayon sa may ari ng resort, itinayo nila ang mga rebultong ito upang bigyang aliw ang pagpasok ng mga panauhin sa resort.

 

Ang bayad namin sa cottage ay nagkakahalaga ng 300 pesos habang ang entrance fee naman ay 35 pesos kada isang tao ngunit kung sa mga bata ay 25 pesos. May dalawa itong swimming pool isa para sa mga bata na katamtaman ang babaw at isa para sa mga matatanda na hindi ganoon gaanong malalim, nakita rin namin na talaga namang maalaga ang staff dito dahil sila ay laging nag- iikot upang siguraduhin ang seguridad ng mga tao partikular na sa pagka lunod.

 

Bukas ang Marieya Resort 24/7 at p'wede rin ang night swimming o mag overnight ngunit may karagdagang bayad.

Maaring mag overnight sa resort na ito na talaga namang napaka ganda ng ambiance dahil sa mga pailaw na mistulang isang parke.

 

Hindi mawawala ang slides na talaga namang nagbibigay saya sa aming mukha dahil hindi kumpleto ang piknik kung walang slides, bawat mukha ng mga bata hanggang sa matatanda ay talaga namang mageenjoy dahil mayroon itong dalawang paladusdusan isang pambata at isang pang matanda. Maari ka ring mag renta ng bola na depende ang presyo sa bawat laki nito na maari mong gamitin habang na sa pool.

 

Nang kami ay nakaramdam na ng gutom kami ay bumili ng mga pagkaing sitsirya at inumin upang idagdag sa aming dala- dalang pagkaing ulam at kanin dahil nga ang resort na it ay walang espesipikong tinitindang pagkain. Mayroon din silang videoke na kung saan maaring mag kantahan ang magkakapamilya o magkakaibigan para sa mas masayang bonding na nagkakahalagang 200 pesos. Dito ay nasaksihan namin ang saya ng mga pamilya at magkakaibigan, habang nagkakantahan maririnig ang birit at nararamdaman sa bawat letrang kanilang kinakanta.

 

Sa pag pasok din sa resort ay mapapansin ang mga motor na kanilang ibinebenta na talaga namang magaganda at abot kaya dahil minsan ang presyo ng mga ito ay negotiable basta at makikipag- usap na mahinahon at mabuti sa kinauukulan. Maaaring walk- in ang pag check sa kondisyon ng motor o kaya naman ay online sa pamamagitan ng messenger chats.

Ang mga staff dito ay napaka maalaga at madaling lapitan. Mula sa pagdating ninyo sa resort hanggang sa inyong pag- alis, sigurado ang kanilang kabaitan at pakikitungo sa bawat isa.

Nang kami ay dumating sa resort, agad naming naranasan ang malugod na pagtanggap ng mga staff. Ipinapakita nila ang kanilang mga ngiti at mainit na bati upang magbigay ng komporta at magpabatid na kayo ay malugod na tinatanggap dito. Handa silang tugunan ang inyong mga katanungan at pangangailangan sa abot ng kanilang makakaya.

 

Habang kami ay naliligo panandalian muna naming nakalimutan ang aming mga problema at pasanin sa buhay. Dito nakaramdam kami ng kapanatagan ng loob at kahit papaano ay nakapag relax ng kaunti sa malamig na tubig nito, napawi ang stress at bigat na nararamdam sa aking pang araw- araw na pamumuhay at napalitan ng kasiyahan at kagaanan ng puso mula sa bigat ng nararamdaman. Nabighani sa kabaitan ng mga tao at na mangha sa kagandahan ng local na resort na ito na pinapalibutan ng mga puno’t dahon.

Ang pagbisita sa resort na ito ay isang magandang karanasan dahil ito ay isang pampaginhawa, isang pag-alis sa realidad, at isang daan upang maalala ang tunay na kahalagahan ng buhay. Sa huli, hindi lamang ito isang paglalakbay, kundi isang pagbibigay ng bagong pananaw at damdamin ng kasiyahan at kapayapaan. Kaya't hayaan mong ang iyong mga paa'y humakbang patungo sa isang resort, at buksan ang iyong puso't isipan sa mga bagong karanasan at kakulangan sa mga hindi malilimutang alaala. Hindi mona kailangan pang bumyahe ng malayo at mag bayad ng mahal upang magpahinga dahil ang Marieya Resort ay malapit at abot kaya. 

 

Ngayon mas handa na muli kaming harapin ang mga hamon ng buhay, responsibilidad, at gawaing naghihintay na ma tupad. Kaya ano pa’ng hinihintay ni’yo? Bisitahin na ang gandang mala paraiso, mga punong sumasayaw sa galak at mga hanging umiihip sa tuwa. Talagang mararamdaman ang pahingang kailangan sa Marieya Resort, ang lugar na puno ng puno na talaga namang pupunoin nang tuwa at pahinga ang iyong puso’t kaisipan na puno ng kabigatan.