Pambihirang kagandahan ng Balete Tree o Millenium Tree

 Sa mga nagdaan na araw na puno ng mga problema. Nagsabay sabay na problema sa pera, pamilya, pag-aaral, at iba pa. Kasama ang aking mga kaibigan, naisipan namin na pumunta sa isang lugar na kung saan makakalanghap ng sariwang hangin at makasulyap ng magandang kapaligiran na makakatulong upang aming pansamantalang makalimutan ang reyalidad at makahinga sa mundong ating ginagawalawan. At unang pumasok sa aming isipan ang pinakamalapit at sikat na pasyalan na pinupuntahan ng maraming turista, na nagmula pa sa iba’t - ibang sulok ng Pilipinas at ang iba ay nagmula pa sa ibang bansa. Ang pinaka malaking puno ng Balete sa buong Asya, na may lawak na higit kumulang animnapung (60) metro, taas na animnapu’t  lima (65) metro, at tinatayang edad na higit sa 600 taon ay nagbibigay ng kahanga-hangang tanawin.

Mula sa aming paaralan, naglakad kami sa patag at malawak na kalsada patungo sa natatanging Balete Tree o tinatawag ding Millenium Tree ng Brgy. Quirino, Maria Aurora, Aurora na ayon sa mga nakatira rito ay nakaplano daw ang bawat sulok ng barangay na ito kaya’t napakalawak at ganda nga ng barangay na ito.. Sa bawat hakbang, nadama namin ang naghalong kaba at kagalakan sa pagtuklas ng kahanga-hangang tanawin na naghihintay sa amin. Malayo pa lamang natatanaw na namin ang ganda at laki ng Balete Tree.

At nang kami ay makarating, ay agad kaming nagbayad ng entrance fee na nagkakahalaga ng 20 pesos para sa mga kabataan ,15 pesos sa senior citizen at 10 pesos naman sa mga bata. Abot kamay lamang ang presyo kaya hindi mabubutas ang iyong bulsa. At pagkatapos  mong magbayad ng entrance fee, ay makikita mo na ang kabuoan ng matayog na  balete tree  at mapapansin din ang nagsisilakihan nitong mga sanga at mga ugat.  Sa aming bawat hakbang papalapit sa puno ng Balete Tree, ay mas lalo namin nasisilayan ang kagandahang taglay ng punong ito.

Habang kami ay naglalakad sa palibot ng makasaysayang puno, ay agad na pumukaw sa aming atensyon ang bilihan ng mga pagkain at pasalubong.  Sila ay naggagawa at nagtitinda ng iba’t ibang klase ng pagkaing lokal. Makikita mo rin ang aktwal na paggawa o pagluto ng pakumbo at iba’t ibang uri ng suman na sila rin ang gumagawa at nangunguha ng mga sariwang sangkap nito. Tunay ngang napakasarap ng kanilang mga gawang pagkain dito, at malalasahan mo sa sarap nito na tunay na ginawa ito ng may pagmamahal. Sila rin ay nagtitinda ng mga pwedeng pasalubong tulad ng kanilang pinagmamalaking sikat at dinadayong suka, keychains, t-shirts, mugs, baskets, pamaypay, at marami pang iba na maaari mong ibigay sa iyong mga minamahal sa buhay na hindi mo nakasama sa pagtuklas ng kagandahan at kasaysayan ng balete tree. Kitang kita sa mga mata ng bawat taong bumubuo at nangangalaga sa Balete Tree ang saya at ang kagalakan sa kanilang mga nilalaang kilos upang lalong mapaganda at mapangalagaan ang makasaysayang punong ito.  Marami ring iba’t ibang uri ng pagkain na mabibili rito tulad ng mga chips,  bagong pitas na malalaki at matatamis na suha mula sa kanilang taniman, at bagong pitas na buko na sobrang tamis at lamig. Mayroon din silang tinitinda na pwedeng itanim na patubo na Dwarf Coconut tree na maaaring bilhin ng kahit sino mang turista, sapagkat ang preso nito ay hindi mabigat sa bulsa .

Sunod naming napansin ang Tren na nakahinto sa harap ng puno ng balete, na kung saan ito ang kanilang ginagamit upang sila ay makapasok sa kanilang “Secret Garden”. Ang lugar na kung saan makikita mo ng iba’t ibang disenyo na kanilang mga binuo sa lugar na iyon.

Hindi lingid sa aming kaalaman na unti unti na pala naming nakakalimutan ang reyalidad o sa mga problemang aming kinakaharap.

Habang kami'y papasok sa loob ng puno, nadama namin ang kasaysayan na bumabalot dito. Ang bawat hakbang ay puno ng kasiyahan at kakaibang karanasan. Ang mga liwanag ng araw na sumisilip sa bawat butas sa pagitan ng mga ugat habang kami ay naglalakbay papasok sa loob ng balete, na parang naghuhudyat sa amin na sa bawat daang madilim na ating kinakaharap, ay mayroon pa ring liwanag sa dulo nito na kung matatagpuan natin ang magadang resulta ng bawat kadiliman o masasalimot na nakaraan. Sa tuktok ng puno, ang tanawin ng kabundukan at karagatan ay higit pa sa aming inaasahan. Ang preskong hangin at tunog ng mga ibon ay nagbigay ng kasiyahan at katahimikan sa aming puso.

 

Ang aming paglalakbay sa Balete Tree ay hindi lamang isang simpleng paglilibot, kundi isang pagkilala sa kahalagahan ng kalikasan at kasaysayan. Ang punong ito ay isang patunay na kahit sa gitna ng modernisasyon, ang kalikasan ay mananatiling isang mahalagang bahagi ng ating buhay. Ito ay isang paalala na dapat nating pangalagaan at respetuhin ang ating kapaligiran. Aming ding natuklasan na sa kabila ng teknolohiya, sa kabila ng pagiging abala sa mga kaganapan sa buhay, sa kabila ng mga kinakahrap mong problema, ay kailang nating magpahinga o magmuni-muni tulad ng pagpunta sa mga lugar na may magagandang tanawin sa ating paligid.

 

Sa aming pag-uwi, dala-dala namin ang mga alaala at aral na natutunan namin sa aming paglalakbay. Ang pagpapahalaga, pangangalaga, pagpapalago at pagpapayaman sa kalikasan, at pagkilala sa kasaysayan ay mga bagay na hindi namin malilimutan. Ang aming paglalakbay sa Balete Tree o Millenium Tree ay nagbigay sa amin ng mga karanasang puno ng kasiyahan at pagkatuto na aming palaging bibitbitin sa aming mga puso at isipan araw-araw.

 

Sa hinaharap, nais naming magpatuloy sa paglalakbay at pagtuklas ng iba pang natatanging yaman ng ating bansa. At ipagpatuloy ang paniniwala at tradisyon na dapat nating tangkilikin ang bawat yaman ng ating bansa na sariling atin talaga. Ang paglalakbay ay isang paraan upang maipakita ang ating pagmamahal sa kalikasan at kultura ng ating mga komunidad.

 

Tunay na napakaganda at kahanga-hangang karanasan ang aming paglalakbay sa Balete Tree ng Maria Aurora, Aurora. Ito ay isang patunay na ang Pilipinas ay puno ng likas na yaman na dapat nating ipagmalaki, paunladin at pangalagaan upang ang mga susunod na henerasyon ay maabutan pa ito at kanila pang mapakinabangan sa kanilang hinaharap.